22 min read

兩類問題

後現代嘅世界,除咗人類識得學習,就連機器都識得學習。當機器都識得學習,作為人類嘅一份子,就更加要反省,學習係乜嘢一回事。
兩類問題
Photo by Lyman Gerona / Unsplash

Thinking on Thinking #1

簡單總結今日分享嘅概念:第一類問題 vs 第二類問題、人腦 vs 電腦、focused vs diffused learning。

01,早兩個星期有位朋友問:「可唔可以分享多啲關於學習嘅方法?」(大概意思)

02,呢個題目,我極有興趣,原因兩個。首先,最基本當然係我哋都希望自己可以係個不斷進步嘅人。但更重要係,後現代嘅世界,除咗人類識得學習,就連機器都識得學習。當機器都識得學習,作為人類嘅一份子,就更加要反省,學習係乜嘢一回事。

03,小學生都知,人類跑又跑得慢過其他動物,氣力又唔係特別好,生存之道不外乎兩件事:(一)人與人之間透過溝通建立出嘅社群;(二)借助工具將人類薄弱嘅力量放大,改變環境。以上兩個生存之道,以唔同嘅形式融合,結果就係人類文明嘅進程,亦都係巴別塔嘅比喻。

04,一萬年前,最重要嘅知識,可能係知道邊度可以搵到水源、搵到食物。一千年前,最重要嘅知識,可能已經係點樣建造水利、幾時種啲乜嘢植物、點樣養牲口、點養管理農奴。一百年前,人類要識嘅嘢,已經唔再係可以用一句說話講得晒。當知識,亦開始專門化;與此同時,我哋唔需要人人都識得點搵水源,點樣種菜、養豬。

05,分工,合作,係人類文明之本。 不過,由分工引起嘅 Generalist vs Specialist 之辯,我個人認為係偽命題。學胡適話齋,真正嘅識見修養,好似金字塔,個底夠闊,先至建得夠高;兩個條件,缺一不可。知識嘅分工,唔代表我哋要將自己嘅眼界局限。

06,資訊,就對事實簡單陳述,例如今日氣溫幾多度,會唔會落雨。知識同資訊最大嘅分別,在意義在於知道之後,你可以有啲乜嘢行動。例如知道今日會落雨,你又知道有好多失魂魚會唔記得帶遮出街;如果你知道幾時,去邊度賣會搵到最多唔記得帶遮嘅人,呢個就唔單止係資訊,而係 actionable 嘅知識。

07,學習,其實就係搜集同整合資訊變成知識嘅過程。人類本能有基本嘅學習能力,但高層次少少嘅,就已經係後天嘅功夫。

08,從小朋友點樣去認知世界,大概都可以見到點樣由簡單嘅認知發展出複雜嘅概念。小朋友學習語言,最初都係認人、表達簡單嘅感覺(餓、眼瞓、開心、痛、嬲、熱、凍)、顏色、形狀、字母、動物、水果、稱呼等。再之後,下一步嘅學習 就係類比,例如「蘋果同橙都係水果」「小雞對小鴨都係鳥類;但小鴨識游水,小雞唔識。」

=文章餘下部份,訂戶專享 =

This post is for paying subscribers only